Surtot sch’ins vign sez activ ; seia chegl sulet u cun oters ansemen. Musica è emoziun, wellness, expressiun ed art. Pero an amprema lengia plascheir, forsa schizont en gnoul luxus. La musica lascha amblidar la hectica da noss taimp.
PrimaMusica porscha per unfants pitschens da 3 anfignen 5 onns e lour genitours igl amprem contact cun la musica tar la SMGC. Istorgias, codeschs da maletgs, muvimaint e zambergeda dattan impuls per la musica.
La scolaziun fundamentala da musica è per unfants dalla sagonda scoligna e scolars/as dall’amprema classa. Chella scolaziun da basa è integrada aint igl urari da scola. Igls cumegns surpeglian la taxa da scola.
Per cattar igl dretg instrumaint ò li pigls scolars dall’amprema classa igl parcour d’instrumaints. L’antiera populaziun è alloura anvidada agl de d’instrumaints durant la premaveira. Divers instrumaints son neir experimentos cun ageid digls scolasts/as da musica. Lecziuns da sondadi servan per sa decider definitiv pigl instrumaint giavischia.
Mintgign ò sies tempo. Perchegl è l’instrucziun individuala da cunsiglier surtot per l’antschatta. Chella instrucziun na scloda pero betg da sunar e cantar an dus u an treis pi spert tgi las premissas lubeschan chegl.
Ena fegnameira impurtanta è da sunar e cantar an cuminanza. Diversas abilitads vignan promoveidas: tadlar l’egn sen l’oter, dar curasch e sustigneir viceversa, saveir crititgier ed er acceptar critica, veir plascheir da l’activitad communabla e cotras far plascheir ad oters (auditori).
La scolaziun da musica tar la SMGC so esser en ageid per tgi las uniuns cattan novs commembers qualifitgias. Per musicants/as e cantadour/as activas porscha la SMGC igl support bisignevel.
Schi la musica dess davantar igl mastier, stò la scolaziun fundamentala da musica esser fitg solida. Savens è la scola da musica l'amprema staziun an la "carierra da musica". Tests da livel, concurrenzas, scolas da talents e roms d'accent da musica an las scolas medias èn preparaziuns ideals per saveir cuntanscher las fegnameiras dalla scol'ota da musica.
