Scolaziun fundamentala da musica

La scolaziun da musica fundamentala less lascher experimentar la "musica". Chella scolaziun duess dasdar e promover igl plascheir per la musica. Santeir, s'exprimer, recepeir e canoscher elemaints musicals èn la miglra premissa e preparaziun per en'instrucziun instrumentala futura. Chella scolaziun da basa è integrada aint igl urari da scola. Igls cumegns surpeglian la taxa da scola. 

Educaziun da musica elementara cun noss unfants

La musica cumpeglia igl antier „carstgang“: corp, orma e spiert. Perchegl gioia la musica ena rolla impurtanta an l’educaziun. Educaziun musicala animescha spiert e fantascheia, desda las forzas digl sentimaint gio an la veta d’unfanza e promova uscheia igl unfant an sies svilup general.

Gio bod lessan nous promover la disposiziun an furma generala, dasdar talents zuppos ed animar igls unfants. Nous igls lessan sensibilisar per valetas artisticas. Gl’è fitg impurtant da dasdar, animar e da mantigneir igl plascheir digl cunfar e lour ager. Igl unfant vot gio amprender, el spetga nossa animaziun. Pigl unfant monta amprender: sa fatschantar activamaintg cugl conturn. El tschertga experientschas durant giuier, tigl sa muantar ed an la confrontaziun cun igls concarstgangs. Igl unfant vot amprender antras ampruar, esser activ, antras atgnas manipulaziuns e directadad, betg antras abstracziun u dressura dad ordvart. Antschatta sagond onn da scoligna anfign la fegn dall'amprema classa.

Fegnameiras musicalas dalla scolaziun fundamentala

Scu prancepi da nossa lavour da musica spezifica vala igl motto dalla gronda educatoura Mimi Scheiblauer: santeir - tgapeir - numnar. Novas noziuns e cunaschientschas duessan igls unfants evenimentar corporalmaintg, spontan ed inconsciaint, sessour duessan chellas neir tgapeidas consciaintamaintg e pir siva neir numnadas. Igl cuntign musical da nossa instrucziun sa cumpona da tschintg elemaints:

Melodia, muvimaint tonal

All’antschatta dalla lavour melodica lainsa evenimentar ot - bass, chegl er antras muvimaints. Igl clom digl interval dalla terza (SO - MI) scu er la furma da (LA-SO-MI) èn per la scolaziun dall’ureglia da grond’impurtanza. Successiv vign angrondania igl spazi da tungs antras versets e canzungs. L’ureglia digl unfant duess an amprema lengia s’accorscher igl nov tung. Improvisar pitschnas melodias e gis melodics da dumonda e rasposta cumplettan chella lavour tonala.

Ritmus

Igl sentimaint ritmic e la siertad ritmica èn impurtants ainten la practica da musica. Chella abilitad ègl da dasdar e promover gio da pitschen anse. La ritmica duess neir evenimentada antras igl antier corp: eir, marschar, sagleir, pitgier, saltar .. Scu valetas da notas igls unfants amprendan la mesa, quarta, l’otgavla e la quarta pôssa.

Expressiun

L’expressiun musicala dastga betg neir negligeida (dinamica, tempo, articualaziun). L’udeida vign cotras sensibilisada pi fitg ed igl cunfar davainta pi disfranztgea.

Furma

Mintga toc da musica ò ena furma, en urden (tacts e frasas). Chellas ègl da santeir e canoscher. Chegl pretenda pero da s’adattar e s’integrar. Antras la musica igl carstgang s’accorscha d’esser l’egn cun l’oter, l’egn siva l’oter ed egn cunter l’oter.

Calour

La finala è la dretga schelta digl instrumaint decisiva. La scolaziun fundamentala paregia e cunseglia igls unfants cumpetentamaintg. Els amprendan a canoscher divers instrumaints, sias calours da tung e tecnica da sunar.

Cun sunar e cantar ansemen amprendan unfants an la scolaziun da musica fundamentala da tadlar l’egn sen l’oter, en aspect sozial impurtant! Tiers igl instrumenatri d’Orff stattan an dispusiziun: la sunareia (pitgier), la flauta da 6 tungs (zuflar) ed igl psalter (stritgier). Cun chella retga collecziun dad instrumaints divers, pon igls unfants canoscher plessas calours da tung e modas e manieras da produtgier talas.